Día das Bibliotecas Escolares 2022

A Biblioteca do CPI Cabo da Area desexa conmemorar o Día das Bibliotecas Escolares, que se celebrará o vindeiro luns, 24 de outubro, coa gravación dun vídeo deseñado e editado por Triana Salvador (1º ESO), Iria Costa e Enma Lobelos (3º ESO), alumnas voluntarias da Biblioteca de Secundaria. As tres estudantes idearon o produto audiovisual ao que podedes acceder desde a ligazón que figura ao final deste post coa finalidade de promocionar os servizos e recursos dos que dispón a Biblio do Cabo e que oferta a todos os membros da nosa comunidade educativa. Triana, Iria e Enma realizan un percorrido polos distintos espazos da biblioteca do CPI Cabo da Area, describindo a súa funcionalidade e amosando os fondos bibliográficos e multimedia cos que contamos. As tres alumnas, xunto cos seus compañeiros e compañeiras, converten esta área nun centro vivo para a construción da aprendizaxe e para a convivencia armónica entre distintos grupos de estudantes que atopan nela o seu punto de confluencia. O club de lectura, a celebración de charlas e obradoiros temáticos, os encontros con artistas, as sesións de debate, a organización das actividades vencelladas ás diferentes festividades culturais ou os momentos de estudo converten a nosa biblioteca nun espazo sociocreativo arredor do que xira a vida do CPI.

Nos vos perdades o vídeo integramente preparado por Triana, Iria e Enma para todos e todas vós: https://drive.google.com/file/d/1NqM9xCIIWkk1XpiiQXliGsLlcwZVvnh2/view?usp=sharing