A Biblioteca do CPI Cabo da Area, en colaboración co Equipo de Dinamización da Lingua Galega, organizou tres concursos especialmente dirixidos á celebración do Samaín. No primeiro deles, o Certame de Manualidades Terroríficas, participou o alumnado de Educación Infantil e 1º, 2º e 3º de Educación Primaria. O gañador da primeira modalidade foi o alumno Marco Suárez Busto (EI, “Baleas”), mentres que Mouhamed Mangara Lo (3º EP) se converteu no vencedor da súa categoría. Non vos perdades a exposición das excepcionais creacións de ambos estudantes, xunto coas aportacións do resto dos seus compañeiros e compañeiras, que se atopan na montaxe que acolle ao longo destes días o hall principal do Edificio de Infantil e Primaria do noso CPI.
Así mesmo, o Concurso de Relatos de Terror obtivo unha grande aceptación entre o alumnado de 5º EP a 4º ESO, que participou con numerosas mostras da súa creatividade literaria. O gañador da categoría de 4º, 5º e 6º EP foi Edu Pombo Cousillas; mentres que as estudantes Miriam Insua Silva e Ainara Rodríguez Blanco se alzaron co primeiro premio nas modalidades de 1º e 2º ESO e 3º e 4º, respectivamente. Velaquí tedes os relatos gañadores, xunto coas imaxes da exposición dos textos finalistas, que se atopa na Biblioteca do Edificio de Secundaria.
Por último, o alumnado de 3º e 4º ESO participou tamén no Certame de Epitafios, no que resultou vencedora Cristina Santos Facal, grazas á súa mestría na elaboración dos textos, sazoados de coidadas doses de ironía e humor negro. Xunto cos seus escritos, podedes atopar tamén os pertencentes aos finalistas do concurso, igualmente expostos na Biblioteca de Secundaria do centro.
